Seegogga se Bloggie

Liewe Leanie, Annika en Lienkie

Kom ons kom ‘n bietjie terug na die fisiese verhouding tussen man en vrou.  As twee mense lief is vir mekaar, onwikkel die fisiese verhouding spontaan.  Kom ons veronderstel julle het vir julle ma geluister en die ou bietjie teruggehou( en ook julleself) en stadig  gegaan met die fisiese verhouding.

Soos julle verhouding groei, so sal julle fisiese verhouding groei en die behoefte na mekaar groter.  Naderhand is soen net nie meer genoeg nie!( LW, Lienkie, jy is nog baie jonk.  Daar le nog baie jare voor voordat jy kan dink aan trou.  Op jou ouderdom is drukkies, soentjies en lekker lang omhelsings genoeg!  Moenie verder gaan nie, spaar uit vir later!)

Julle sal begin wens die ou wil ‘n bietjie verder gaan.   Hy wil natuurlik lankal verder gaan en sal altyd probeer, maar nou sal jy hom toelaat. Onthou tog stadig op die trappies!

Tog, jy sal ‘n verandering in jou lyf bemerk.  Soos hy al lankal die drang tot seksuele omgang het, sal jy ook begin om baie opgewonde te raak.  Jy sal vind dat jou bekkenvloerspiere sterk saamtrek om jou gereed te maak. Onthou egter dat jy graag wil wag tot jy getroud is.

Ek glo regtig dat kondome nie die antwoord is nie.  Navorsing het ook nou bewys dat al die VIGS-voorkomingsprogramme totaal onsuksesvol was. Hierdie programme verkondig almal dat mens tog net asseblief ‘n kondoom moet gebruik, en het oral in die badkamers gratis kondome neergesit. Wel, ek glo nie daaraan nie.

Eerstens is kondome nie 100% veilig nie – en ons familie is SUPER vrugbaar( vgl. Julle oumagrootjie se 11 kinders, almal met kinders, en hulle kinders ook weer almal met kinders. Net een onbesonne misstap is genoeg om jou hele lewe te verander.

Onthou ook die hoofdoel van die seksdaad, naamlik voortplanting.  Ons glo dat God wil he dit moet BINNE die huwelik gebeur. As dit nie so was nie, sou ons nie emosionele verbintenisse ( liefde!) gehad het nie, en sou seks nie iets gewees het wat ons so geweldig emosioneel geraak het nie.

Soos dit nou is, raak ‘n mens lief vir iemand en geheg aan hom en wil by hom bly.  Ek glo dit is so sodat die ou babatjie wat gebore word, ‘n pa en ‘n ma kan he.  Hy het albei ouers nodig om ‘n gebalanseerde volwassene te word.

Die Bybel se ook dat die man en vrou ” een  vlees” word en dat dit wat God saamgevoeg het, geen mens mag skei nie.  Die huwelik is die wettigmaking van hierdie verbintenis.  Dit is die kroon op julle emosionele sowel as julle fisiese verhouding.. Wag dus tot jy getroud is.  Moenie hierdie grootse avontuur bederf nie.

Dis makliker gese as gedoen as ‘n mens lank uitgaan.  Leanie en Anika, dit kan regtig moeilik raak en later kan ‘n mens dalk voel, ag waarom nie, ons gaan tog trou?

Moenie! Hou uit, wag!  Jy wil nie graag die res van jou lewe teleurgesteld in jouself wees nie.  Jy wil ook graag eendag jou eie kinders met eerlikheid reg kan leer.

Dit is baie gevra, maar julle is kosbaar. Julle sal nooit spyt wees dat julle gewag het nie, glo my.

Lekker slaap en baie liefde.

Ma

Liewe kinders

Ek is baie lief vir julle. Ek sal so graag elkeen wil beskerm teen hartseer en graag wil he julle moet altyd so gelukkig wees met julle kerels soos julle nou is. Ek kan maar net bid.

Maar waar daar liefde en geluk is, is daar gewoonlik ook pyn. So is die lewe maar. En as daar dalk pyn oor julle pad kom, huil gerus en treur, maar onthou altyd dat die lewe aangaan en dat daar weer nuwe geluk in die toekoms wag. Moet nooit dink die einde van ‘n verhouding is die einde van geluk nie. God is goed. En tyd heel wonde. Maar wat praat ek alles. Julle het nou al 3 sulke gawe ouens. Geniet hulle.

Lekker slaap en baie liefde.
Ma

Liewe Leanie, Annika en lienkie

Dit bring ons by die volgende aspek: GELOOF.

Julle gaan nou al drie vas uit. Bid vir God om vir julle die pad te wys – is dit die regte ou vir jou? Bid vir julle verhouding. Bid vir jou ou!

Bid ook saam met jou ou. As julle twee saam oor julle geloof kan praat, as julle saam kan bid, is dit wonderlik.

Geloof ( of die gebrek daaraan) is vir alle mense ‘n rigtingwyser en ‘n anker ( of nie). Sonder geloof raak ‘n mens maklik drywend. Geloof dra ‘n mens deur diep waters, dit hou jou op die regte pad, dit bind jou saam. Bid alleen, maar ook saam en jy sal sien dat julle verhouding ‘n nuwer, dieper dimensie kry. God sal vir julle duidelikheid gee oor baie dinge. Hy sal julle dra en beskerm.

Bid vir jou ou!

Lekker slaap en liefde.

Ma

Liewe Leanie, Annika en Lienkie

Ons praat nou so baie oor die fisieke aspek van die verhouding. Dit is egter die emosionele deel van die verhouding wat belangriker is.

Is jy vriende met jou ou? Het julle dieselfde waardes? Is daar iets in hom wat jou hart raak? IS jy lief vir hom? Kan jy sien hy is lief vir jou? Is hy eerlik? KAN JY HOM VERTROU? liefde en respek impliseer vertroue. Immers gee jy jou hart vir hom om vas te hou. En ‘n mens kan nie iets so kosbaar vir sommer enigeen gee nie. (En as jy nie jou hart kan gee nie, beslis ook nie jou lyf nie). Pas dus jou hart mooi op.

‘n Mens kan redeneer dat jy nie kan keer op wie jy verlief raak nie – dit gebeur sommer net. Veral in die flieks lyk dit so. Onwaar! In jou lewe gaan jy baie ouens en mans ontmoet wat jou hart vinniger laat klop – ook ander meisies se ouens, getroude mans, hartebrekers ( players – soos Lienkie sou se), ateiste, drinkers (boozers), ens. Daar is baie visse in die see en baie tot wie jy aangetrokke kan voel – as jy dit toelaat.

Maar ‘n mens het ‘n verstand ook. En glo dit of nie, hy kan en is sterker as jou hart. GEBRUIK HOM! As dit nie so was nie, was ons almal al in buite-egtelike verhoudings en sou die huwelik sinneloos wees.

‘n Mens KAN  iemand ontmoet en BESLUIT: “Nee, nie vir my nie, al wil jou hart dalk bokspringe gee. Gebruik dus jou verstand voor jy jouself toelaat om halsoorkop verlief te raak. My kinders, kies tog iemand op wie jy kan vertrou. Iemand wat volkome eerlik is. Jy wil rustig slaap snags. Jy sal veilig, gekoester voel in sy arms.

As jy egter die regte persoon vind – die een wat aan jou standaarde voldoen, maar wat ook jou hart vinniger laat klop, die een wat ook so oor jou voel, is dit ‘n wonderlike ervaring en is julle fisiese verhouding nie net seksueel van aard nie, maar byna heilig – soos ‘n gebed.  So ‘n verhouding vervul ‘n mens met ‘n wonderlike geluk en vrede, so anders as ‘n blote seksuele verhouding, wat “leeg” voel en selfs “vuil”.

Ek bid dat julle in julle verhoudings met julle ouens so sal voel – en hulle so oor julle – dat julle verhoudings in die hemel gemaak sal wees.

Lekker slaap en liefde.

Ma

Liewe Kinders

Kom ons gesels vannaand ‘n bietjie meer oor “vry”. In my tyd  het ons definitief nooi ge’vry’ nie. Dit was platvloers!  Ons het opgesit, gekafoefel, gekoeksister of wat ookal. Maar nouja, eintlik is vry ‘n goeie baie outydse Afrikaanse woord. En dis lekker!

Die probleem is dat ouens hou van ‘n lekker vrytjie, sonder noodwendige emosionele verbintenis. Meisies wil weer he die ou moet van hulle hou. Sommige meisies verkeer onder die waan dat die ouens meer van hulle sal hou as hulle hulle toelaat om te vry. Geensins! Die ou sal vat wat hy kan kry, ja. Hy sal dalk selfs ‘n bietjie met die meisie uitgaan – om te kry wat hy wil.  Maar die meisie vir wie hy regtig lief raak, is ook een vir wie hy respekteer.

           ‘n Man gee liefde om seks te kry,

          ‘n Vrou gee seks om liefde te kry.

Ongelukkig  is dit waar in baie gevalle.  En die meisie besef nie dat die ou wat rerig vir haar lief is, vir haar lief sou geword het sonder die vry ook nie, of selfs dalk juis omdat sy nie so maklik ingee nie ( die ewige jagter).

Die ander probleem is druk – van jou ouderdomsgroep, van die media – die pers en TV, en van die ou self.  Aangesien baie tieners baie losse sedes het en sommer vroeg-vroeg baie ernstig vry of saam slaap, kan ‘n mens maklik voel dat jy agter die tyd is, outyds of koekerig. Op die TV ontmoet die paartjie mos mekaar, soen en dan waai die klere en volg ‘n stomende ( pornografiese?) bedtoneel. Aangesien ons almal dit so baie sien ( is daar nog ‘n fliek sonder so ‘n buite-egtelike bedtoneel?), kan ons maklik begin dink dat dit maar so moet wees.

Voeg nou hierby ‘n man met normale sterk drange.  Jy voel dalk dat jy iets moet toelaat omdat dit algemeen is – almal doen dit.  Die vraag is of jy regtig gereed is daarvoor- en ons praat nie van ouderdom nie.

‘n Mens is eers gereed vir die volgende trappie as jy regtig smag daarna en al ‘n hele ruk lank wens die ou wil nou dit of dat doen. Voor jy so voel, moet jy hom terughou.

As jy iets toelaat voor jy emosioneel en fisiek daarvoor  gereed is, geniet jy dit in elk geval nie soos dit geniet behoort te word nie, en nog meer: jy doen jouself skade aan.

En na so ‘n eerste soen is ‘n meisie eenvoudig nog nie gereed vir ‘n warm vryery of seks nie, al wys hoeveel flieks dit.  Onhou, flieks is meestal deur mans gemaak ( wat nie wil weet dat meisies in trappies werk nie) en wat boonop weet dat hulle iets moet doen sodat mans ook na die fliek kyk, en dat so ‘n warm sekstoneel geld inbring.

Die oomblik dat jy oor iets skuldig voel, of ongemaklik, moet jy weet: jy het verder gegaan as waarvoor jy gereed was.

Waarom sou ‘n mens dan tog skuldig voel? Goed, ons glo ons moet wag tot ons getroud is voor ons seks het ( liefde maak, saam slaap ens). Wat voorafgaan is tog toelaatbaar? Die enigste rede waarom jy skuldig voel, is omdat jy nie emosioneel reg was nie. Jy voel dalk nie lief genoeg vir die ou nie, onseker oor jouself of oor sy gevoelens, jy voel dalk skaam of jy voel dalk nie sexy genoeg nie.

Los en vat jou tyd! En hy moet geduldig wees. As hy nie is nie, is dit ‘n groot waarskuwingsteken. Is dit die regte ou vir jou?

Lekker slaap en baie liefde.

Ma

Liewe Kinders

Nouja, ons weet nou dat ‘n ou baie sterk seksuele gevoelens het en baie daarvan hou om jou vas te hou en te vat wat hy kan kry. Hy sal dalk baie verlief op jou wees, maar hy sal altyd die ander mooi meisies ook nog raaksien.  Onthou, hy is so gemaak.  Dit is normaal.  Om die waarheid te se, as hy nie so is nie, moet jy begin twyfel.

Kyk die kat uit die boom uit.  Hoe is hy andersinds?  Hy mag dalk net latent homoseksueel wees!  Vandag is gays meer openlik as in my tyd, maar nie almal klim uit die kas nie( erken dat hulle gay is nie).  Almal van ons wil graag normaal wees en het in ons kop die idilliese droom van ‘n gelukkige huis met ‘n man, vrou, kinders en ‘n hond(of kat). Ook die gay.  Daar is waarskynlik nie een gay wat nie liewer heteroseksueel sou wou gewees het nie. Daarom ontken party van hulle steeds hulle homoseksuele gevoelens en streef hulle droom na.

Ai, en hulle is SULKE gawe vriende en verstaan SO goed hoe jy voel en het SO dieselfde belangstellings. En ja, hulle het selfs ‘n sterk fisiese drang na jou ook! Maar dalk net na jou- ander meisies laat hulle koud. En jy sal hulle ook later koud laat.

Daar is goedjies wat hulle verklap: ‘n Baie mooi blyplek; ‘n sekere liggaamshouding; vriende wat verdag lyk. Luister vir jou sesde sintuig.

Malan-my-Lam was baie lief vir my(regtig!) en hy was ook nogal vryerig. Maar hy het dikwels in die begin van ons verhouding gese dat Wendy( vriendin van ons) eintlik meer sy geesgenoot is.  Sy was ook mal oor hom. Maar hoewel sy mooi was,  was sy nie vir hom hoegenaamd sexy nie. Sy’t hom glad nie op so ‘n manier aangetrek nie, ten spyte van haar deurskynenderige rokkies. (Asseblief! Mans???) Verder het hy hierdie pragtige gedekoreerde woonstel gehad, kompleet met persiese tapyte en hy was ook ‘n versamelaar van outydse meubels ens.  Ek het  hom ook twee of driekeer sien loop met “snaakse” vriende wat hy nie regig graag wou he ek moes ken nie. (Hulle was bv net besig om te groet, of haastig, of so).

Phil, my goeie gay vriend, het altyd vir my gese dat ek tog nie met Malan moet trou nie, maar wou nooit uitbrei nie. En gelukkig het ek nie! Malan het heeltemal ingekonk. Sy droom was aan skerwe. Hy het uiters promiskieus (met losse sedes) geword om sy droom te probeer herwin. (Sommige gays word juis so en probeer by soveel moontlik  meisies slaap om te bewys dat hulle wel hetero-seksueel is). Eers later, met terapie, het dit aan die lig gekom dat Malan eintlik homoseksueel was, maar dit nooit aan homself wou erken nie.

Ai ja.  Ek kry hom jammer, maar ek is baie dankbaar dat ek nie met hom getrou het nie.

Lekker slaap en baie liefde.

Ma

Liewe Kinders

Ek moet dit maar nou net weer se: Daar is niks op aarde so mooi soos die ontluikende liefde tussen twee jong mense nie. Eers was dit Leanie en Johan, toe Annika en Conrad en nou Lienkie en Jaco. Dis pragtig om te sien hoe die outjie heeltyd aan jou wil raak, hoe hy lag en die teer uitdrukking in sy oe as hy na jou kyk. Dis pragtig om te sien hoe jy bloos en glimlag en straal. Geniet elke oomblik!

Lekker slaap en liefde.

Ma

Liewe Leanie, Annika en Lienkie

Ja, ouens is dus dikwels meer sexy, meer fisies en meer liberaal. Hulle soek soms meisies net vir ‘n lekker vrytjie en kry gewoonlik ook een. ‘n Spreekwoord onder hulle is: “In elke bos rose is daar ‘n steek”.  Menende: As daar ‘n groep meisies is, sal een van hulle wel ‘n los meisie wees (wat gesteek kan word). Soek en jy sal vind. Sommige van hulle speel dus soms rond en vlieg van blom tot blom soos enige betaamlike by en hulle vat wat hulle kan waar hulle kan.

Gelukkig is alle ouens darem nie ewe los van sedes nie. Maar vir hulle is hulle eie maagdelikheid nie so belangrik soos vir ‘n meisie nie. Hulle hou egter meestal daarvan dat die meisie met wie hulle wil trou, ‘n maagd moet wees. Hulle is nie mal oor “second-hands” nie.

As sekere “wilde” ouens egter die regte meisie ontmoet, sal hulle wel hulleself “commit”. So ‘n ou sal dan alles vir haar doen en selfs homself benadeel om vir haar die beste te kan gee.( die ridder).

Soms voel ouens baie diep oor hulle meisies. Hulle het lief, verlang en hulle harte word gebreek, nes ons s’n. Moet nooit hulle gevoelens onderskat nie en moenie met hulle speel nie. Hulle is mense net soos jy, met diep gevoelens en kry maklik seer.

Wees versigtig hoe jy trap.

Lekker slaap en baie liefde.

Ma

Liewe Leanie, Annika en Lienkie

Ja, dis wonderlik om verlief te wees.

Dis egter wanneer ons so onbeskryflik lief voel vir ‘n ou dat ons partykeer te veel gee op fisiese ( en emosionele!) gebied. Ons wil graag vir hom alles gee wat ons het!

Ongelukkig werk dit nie altyd so nie. Party maak misbruik daarvan. Hulle soek meer die fisiese deel.  Jou gevoelens is minder belangrik.

Ander wil jou heeltemal oorheers. Hulle raak later baie besitlik, jaloers en voorskriftelik.  Wees versigtig vir ouens wat baie jaloers of besitlik is en bv. vir jou wil voorskryf wat jy moet aantrek ens., alles onder die vaandel van liefde. Jy word so ongemerk-ongemerk sy slavin. Pasop, so ‘n ou raak dikwels later geweldadig. LOS HOM!

Party voel weer bedreig. Hulle is bang om te diep betrokke te raak en voel maklik vasgevang in ‘n verhouding. Party raak heeltemal paniekerig as die meisie begin “moederlik” raak en bv sy kamer aan die kant wil maak of so-iets.

Onthou, hoewel ons dadelik hoogsverlief is en dolgelukkig is om die heeltyd by hom te wees en hom te koester en hy vir jou, is ‘n man se vryheid vir hom baie belangrik. Hy wil soms saam met sy vriende(“die boys”) wees en mansdinge doen, en hy wil nie vasgevang voel nie.

Vergelyk die volgende idiome: Hy het “die strop om die nek”; “Nog ‘n goeie ou het sy gat gesien” ens. Hierdie idiome word net vir die MAN gebruik. Kyk ook op die troues en op troufoto’s na die bruidegomme.  Die bruid is stralend: dit is die gelukkigste dag in haar lewe. Die bruidegom het soms ‘n gespanne trekkie om die mond en lag nie heeltemal so hartlik nie – en soms glad nie!

Pas dus op dat die ou nie voel jy wil hom vashou in ‘n verhouding nie.  Hy sal spartel om los te kom. Hy wil vry voel!

Lekker slaap my liefies.

Ma

Liewe Leanie, Annika en Lienkie

Dit bring my by die emosionele verskille tussen die geslagte. Ook hier is daar ‘n groot verskil tussen die manlike en vroulike geslag.

Lees die ouens in julle lewe graag liefdesstories? Waarskynlik nie. Boeke oor rugby, motors en sulke goed, ja. Maar Mills en Boon en sepies soos The Bold and the Beautiful is net eenvoudig meer ‘n vroueding.

Ons vind ander se liefdesverhale so interessant en ons eie is gedurig in ons gedagtes. Die man se lewe is meer in kompartemente. Hy speel rugby of hy konsentreer op sy werk, of hy dink aan sy meisie, maar nie aan al drie gelyk nie. Hulle se dat ‘n man al die aspekte van sy lewe netjies in ‘boksies’ pak en liaseer. Hulle word in sy gedagtes een vir een oopgemaak, bekyk en weer gebere. ‘n Vrou se gedagtes is ‘n deurmekaar gemaal soos klere in ‘n tuimeldroer. Sy dink sommer so aan alles gelyk!

Vergelyk ‘n fliek oor gevoelens wat ons op ‘varsity gesien het ( voor die dae van selfone): ‘n Jonggetroude egpaar verslaap en die man is laat vir werk. Hy trek haastig aan, gryp sy kosblik en waai by die deur uit sonder om vir sy vrou totsiens te soen.

Sy vrou staan verslae by die halfgeeete bord pap. Hy is werk toe en het haar nie eers gegroet nie! Hy het haar nie meer lief nie! Haar hele dag is geruineer. Sy begin dalk selfs wonder op wie hy dan ‘n ogie het. Sy voel verskriklik “af” en raak depressief. Vyfuur kom hy vrolik by die huis en gee haar ‘n klapsoen. Sy lag nie. Sy is kwaad en teleurgesteld. Hoe kan hy sommerso maak asof niks verkeerd is nie? Hoe skynheilig!

Intussen weet die man glad nie wat hy nou verkeerd gedoen het nie. Hy kan glad nie eers onthou dat hy haar nie behoorlik gegroet het nie. Hy het nie geweet daar is ‘n probleem nie, hy is dan nog net so lief vir haar soos altyd. Maar hy vererg hom dalk nou vir haar ‘nonsens’.

“Love is for a man a thing apart.

     It is a woman’s whole existence.”

Hoewel seuns of mans dalk baie lief is vir hulle maat, is hulle baie minder ingestel op klein dingetjies en dalk minder romanties as wat ons sou wou he.

Ek het reeds gese dat ouens daarvan hou om bewonder te word. Wees vir hom ‘n goeie vriend deur belang te stel in wat hy doen ( al voel jy dalk vere vir rugby en al verstaan jy dalk niks van karre af nie).

Luister aandagtig en vra dan intelligente vrae en laat hom goed voel. As hy met jou oor sulke goed kan praat, sal hy ook meer gemaklik voel om oor gevoelens te praat- iets waaroor ouens gewoonlik nie so maklik praat nie. Deur ‘n goeie luisteraar te wees, gee jy hom kans om sy persoonlikheid te openbaar en so leer jy hom beter ken. En so hou hy ook meer van jou!

Hoe is mens ‘n goeie luisteraar(vriend)? Deur aandagtig te luister en dit te onthou deur dit bv te herhaal om seker te maak dat jy reg gehoor het, deur mee te leef en simpatieke geluide te maak, bv “Sjoe!” “Wow!” ens. Wees egter versigtig om sommer jou eie opinie te gee, tensy dit gevra word bv ” Ek dink jy moet dit en dat doen.” Moet liewer nie sulke kommentaar gee nie. ‘n Mens kan baie diep op hierdie ‘aktiewe luister’  en empatie betoon, ingaan. Ek stel voor julle lees meer daaroor in sielkunde boeke of vra my. Die hoofsaak is om gevoelens te reflekteer.

Ouns hou nou ook meer daarvan om oor hulle eie goed te praat as om die heeltyd na jou meisieprobleme te luister. Ons meisies het mos baie keer allerhande klein probleempies met iemand wat vir ons ‘n skewe woord gese het of ons hare wat nie wil reg nie of ons alewige lyf- en klereprobleme en dan nog ook ons emosies!

Praat liewer met jou vriendinne oor hierdie goeters. Ouens wil dit nie hoor nie en verstaan dit ook nie so lekker nie. Hulle is meer konkreet. Hulle hou egter daarvan om positiewe goed te hoor( positiewe kommentaar, positiewe gevoelens. goed waarvan jy hou of wat vir jou mooi is).

Sorg dat julle mekaar se beste vriende word. As ‘n mens emosioneel naby aan mekaar voel en vir mekaar lief voel, het enige fisiese aanraking soveel meer betekenis. Om te soen en te vry is dan ‘n uitdrukking van julle liefde en gaan nie net oor die seksuele aantrekkingskrag nie. En dit is ‘n onbeskryflike wonderlike gevoel.

Lekker slaap en soete drome.

Ma

Liewe Kinders

“Die taal van die liefde”

Ai, ons pluis noe die saak mooi uit, maar om goeie fisies pasmaats te wees kom nie altyd so natuurlik soos ‘n mens sou dink nie. Ervaring speel nogal ‘n rol, en veral konsiderasie.  Ons weet mos nie altyd wat ‘n ou “trigger” nie en hulle ken weer nie vir ons nie.  Hy dink dalk hy doen die regte ding, maar eintlik het hy nie ‘n “clue” nie – en hy wil so graag dien wat vir jou lekker is. Help hom deur bv jou lyf reg of weg te draai, sy hand te neem en op die regte plek te sit en ook deur vir hom te se as iets vir jou lekker is.

Moenie skaam wees om daaroor te gesels nie. ‘n Konsidererende liefdesmaat wil graag sy maat plesier en dit is vir hom ‘n prestasie as dit wat hy doen, vir haar lekker is. ‘n Mens kry natuurlik ook die ander, selfsugtige tipe wat net om sy eie bevrediging gepla is. Leer hom gou reg of los hom uit!

Let ook op wat vir hom lekker is. Hieroor kan ek baie verte, maar dis net vir Leanie se ore.

Wat sy kop ( die een met die taalsentrum in!) en gesig aanbetref, is ‘n man se nek en ore baie gevoelig en normaalweg hou hulle daarvan op daar gestreel en gesoen te word. Natuurlik hulle hele lyf ook! Vergelyk hulle biettjie met Rusky of enige ander hondjie. Streel hom ‘n bietjie en hy dop om, kry so ‘n glaserige uitdrukking in sy oe en le bene in die lug en geniet die streling sonder enige inhibisies. Partykeer dink ek mans is net so.  Hulle geniet dit om so gepamperlang te word en is glad nie skaam vir hulle lyf nie!

Ons is mos vol allerhande “hang-ups” en inhibisies. Miskien is dit goed so. Dit beskerm ons.  Maar as ons eers getroud is, moet ons al hierdie inhibisies agterlaat. Jou man sal dink jou HELE lyf is pragtig. Glo hom en wees so vry soos hy.

Lekker slaap en liefde.

Ma

Ma, ek’s verlief, oftewel Ma se seksboek, is nou in die handel beskikbaar. Koste slegs R 35 +posgeld van R15 =R50.

Om u kopie te bestel, sms u naam en kontakbesonderhede na 0845874228.

Om verdere hoofstukke te sien, klik hier.