Toortsie het my die opdrag gegee om ‘n ete te maak van R50 of minder en hoewel ek nie ‘n kok is nie( ek het ander talente) het ek darem probeer. So hier is dit. Dalk geniet jy dit.

Spagetti bolognaise

1 groot ui: R1.50 Snipper

‘n Paar druppels olyfolie: R1.oo

Braai die ui in die olie tot deurskynend.

500gm Maalvleis: R24 Gooi by uie en meng.

1 Blikkie tamatie en uiemengsel: R9. Gooi by vleis en uie en roer tot gemeng.

1-2 Blokkies biefekstrak:R2. Krummel en roer in.

Sout, peper, worcestersous, bietjie asyn en baie oreganum: R2. Gooi by.

1 Huisie knoffel( opsioneel): R1 . Druk deur knoffel drukker en gooi by.

Prut nou hierdie mengsel stadig tot gaar met deksel op en roer nou en dan.

Terwyl bolognaise kook:

1 pakkie spagetti : R 9. Kook volgens die aanwysings op die pakkie in groot pot water sonder deksel. Gooi die stukkies een-een in die water sonder om dit te breek en druk geleidelik onder water soos die onderste dele sag word.

As spagetti klaar is, dreineer in vergiettes en skep in dieperige individuele bakkies. Skep die bolognaise bo-oor en eet met ‘n vurk. Die geheim is om net een stringetjie met die vurk teen die kant van die bakkie om en om te draai tot hy deur die vleisies tot rondom jou vurk le, en dan hap jy hom vinnig voor hy afval. Slurp die laaste stukkie string in.

Volgens my berekeninge is dit R 49 vir ‘n groot bak kos en as jy die sente wat ek afgerond het, bytel, het jy R 1.30 of so oor om bietjie gerasperde kaas ook oor te gooi.

Goed, nou moet ek ‘n paar mense vra om ook kos te maak maar wie? Ek hoop nie julle is al gevra nie, maar as julle is, besluit self of jy wil of nie!  Wat van Deurmekaargedagtes, Sout en peper’s blog, Om die kombuistafel en Hier kiep-kiep daar kiep? Kan julle vir ons kos maak vir minder as R50? Ek is seker julle kan.