Boere-sushi – iets nuuts

20200407_181734

Op hierdie foto sien jy ons eerste poging boeresushi. Daar is brood- sowel as pap- sushi, en sommige goedjies soos agurkies is sommer sonder ‘n stysel bedekking geplaas want dit kan ook met of sonder ‘n sousie met stokkies geeet word. Volgende keer sal ek ham – sushi ook bysit.

BOERE- SUSHI!

Ons het mos nou ‘n bietjie tyd om te eksperimenteer, né! Hierdie idee van Suzelle DIY beloof om ‘n wenner te word en is ook ideaal om die oorskiet braaivleis van die vorige aand te gebruik.

Dis ook ‘n lekker manier om ‘n ligte onthaaltjie te hou ( eeeeendag as grendeltyd verby is), want jy maak alles vooraf en hoef nie op die tippie rond te draf nie.

Een ding is seker van Suzelle, sy het beslis idees. So het sy Suid Afrika jare gelede bekend gestel aan die braaipaai, ( https://www.youtube.com/watch?v=caB5VTueduQ )

Nou die dag het sy weer ‘n nuwe idee gekry: Boere -Sushi!

En met haar idee in my agterkop, het ons dit probeer, op ons eie manier, en it was heerlik! Dis ook iets lekkers om vir vriende te maak want jy kan alles vooraf doen, en net die aand geniet as hulle kom.

Hier is ‘n paar idees, sommige hare, sommige myne, en ek glo julle sal ook heerlike idees hê. Die moontlikhede is eindeloos!

  1. Mieliepap sushi. (Mmm hierdie idee is dalk meer vir die mense noord van die Oranjerivier – die papeters, né)

Maak stywerige mieliepap ( of gebruik gisteraand se oorskiet.)

Gebruik kleefplastiek en druk die pap plat daarop, genoeg om ‘n worsie buiteom met ‘n dun lagie pap te bedek. As jy ‘n sushi matjie het, nog beter. Bedek dit net eers met kleefplastiek.

Sit ‘n langerige gaar dun boerewors bo-op jou lagie pap. ( of ‘n repie biefstuk, skaapvleis, ens).

Gebruik nou die kleefplastiek ( of jou sushi matjie) wat onder lê, om die pap om die wors te rol sodat dit soos ‘n lang worsrolletjie lyk.

Indien jy so voel kan jy nou die rol versier soos jy wil, bv met ‘n bietjie paprika, gerasperde kaas , gerasperde biltong, dun avocado skyfies of ‘n strepie tamatiesous wat op die pap gesmeer word.

Variasies: gebruik gebraaide weense worsies of “Russians”,groenetestokkies, bv heel gaar wortels, tamaties ens.

Daar kan ook repies groente bygesit word, bv gaar wortel, gaar broccoli en enigiets kleurvol.Sny nou die rol in ringetjies, ongeveer so groot soos sushi stukkies.

2. Brood sushi (Mmmm, hierdie sal dalk meer in die smaak val van die Kapenaars – die braaibroodjie-eters, né)

Neem ‘n sny brood en sny die korsies af.

Plaas die brood op kleefplastiek, en smeer met waarvoor jy lus voel. Roomkaas werk hiervoor baie goed.

Vul met repies gaar hoender, ham of ander koue vleis, avokadopeer , tamatie, soetrissies, komkommer of wat jy ookal voor lus voel, reg in die middel van die snytjie brood.

Jy kan ook ‘n snytjie ham met roomkaas smeer en vul met ‘n repie brood of agurkies of iets, en oprol. ,

Rol nou die brood op met die kleefpastiek en plaas dit met plastiek en al in die yskas. Dit maak dat die brood sy vorm hou.

Na so ‘n uur of meer, is die brood gereed, en kan die plastiek afgehaal word en die broodrolletjie in skywe gesny word.

Weereens kan jy vooraf die rolletjie versier indien jy so voel. Indien jy ‘n dun lagie botter aan die buitekant wil sit kan jy dit bv in gerasperde biltong rol. Dit is egter nie noodsaaklik nie.

Opdiening

Pak jou sushi skywe mooi uit op ‘n bord. Jy kan op sommige skyfies ‘n klein bietjie mayonnaise spuit.

Maak vir elke gas klein bakkies, met een of meer van die volgende souse:

  1. Tamatie en uiesous ( soos die wat jy oor jou mieliepap sou eet) of sommer gewone tamatiesous sal ook werk.
  2. Balsamiese asyn .Dis veral heerlik saam met die brood sushi.
  3. Chutney.
  4. Enigiets anders wat jy dink sal werk as ‘n dippie.

Gee vir elke gas ‘n kleinbordjie, vooraf versier met ‘n hopie mostert en ‘n stelletjie Chinese eetstokkies.

Ou Matie, en dan geniet jy dit!

As jy graag na Suzelle se idees wil kyk, klik hier: https://www.youtube.com/watch?v=9cIwfj61m0g

About seegogga

Soos 'n krappie op die strand, trap ek spoortjies in die sand. Dalk sien jy iets, dalk niets. Wie sal raai hoe die wind gaan waai?
This entry was posted in Kossies vir 'n seegogga en ander resepte, Los opdrifsels. Bookmark the permalink.

6 Responses to Boere-sushi – iets nuuts

  1. Toortsie sê:

    Dit lyk tog te lekker.

  2. dit lyk lekker en oulike idee vir anders kuier, sal dit ook moet probeer

Laat 'n boodskap

Please log in using one of these methods to post your comment:

WordPress.com Logo

Jy lewer kommentaar met jou rekening by WordPress.com. Log Out /  Verander )

Google photo

Jy lewer kommentaar met jou rekening by Google. Log Out /  Verander )

Twitter picture

Jy lewer kommentaar met jou rekening by Twitter. Log Out /  Verander )

Facebook photo

Jy lewer kommentaar met jou rekening by Facebook. Log Out /  Verander )

Connecting to %s