Verlede jaar het ek dit vergeet, hierdie jaar is ek bietjie vroeg, maar ek het darem onthou: Seegogga verjaar! Op 22 Sept is Seegogga se Bloggie al 2 jaar oud.
In die afgelope 2 jaar het meer as 20 duisend mense kom lees wat hier op my blog staan, van al uithoeke van die aarde. Dit is vir my ongelooflik. Die besigste dag was in Feb vanjaar, toe 130 mense op een dag die blog besoek het. Dis is miskien maar min in vergelyking met julle groot blogs, maar ek het maar net ‘n ou bloggie, en is heel tevrede met my besoekers. Ek skryf mos omdat dit lekker is, omdat ek iets op die hart het, en het nie gedink dit sal so baie gelees word nie.Toe ek nou so die maand stats oproep, lyk dit my tog of die bloggie stadig maar seker groei, al is ek deesdae so half slap en van koers af.
Dinge wat gereeld daagliks gelees word, al is hulle lank gelede geskryf, iseen of ander hoofstuk van Ma se seksboek of van Ouma se bababoek, inskrywings oor die Overberg ,asook 2 inskrywings van lank gelede Daar is niks soos ware liefde en Die deurmekaar tale van kleur, Die eerste is waarskynlik omdat almal maar op soek is na ware liefde, en die tweede waarskynlik omdat ek die kleurwiel bygesit het.
Behalwe een katterige opmerking, het ek regtig geen negatiewe kommentaar gekry nie, wel soms opbouende kritiek by ma se seksboek, wat ek baie waardeer het, en in die gebinde weergawe ingewerk het. Die boekie is goed ontvang deur die tieners waarvoor dit geskryf is.
Maar hierdie week kry ek toe die heerlikste verjaardag geskenk: ‘n e-mail van ‘n wildvreemde persoon: Sy is naamlik samesteller van ‘n leesboek vir gr 7 leerders van ‘n bekende uitgewery, en het my blog raakgelees, en wil een van die stories in my blog gebruik vir die leesboekie!!!
Nou gaan ‘n Seegogga bloggie dalkies in skole gelees word ! Aangesien die onderwysdepartement nog eers die boek moet goedkeur, wil ek nie noual te veel sê nie, maar as hulle dit aanvaar, sal julle beslis daarvan hoor. Ek sal mos nooit kan stilbly nie!
Maar nou is dit eers middernag, en Seegogga moet slaap ook. Dus groet ek eers al my wonderlike blogvriende tot anderdag.
Lekker slaap, en as julle wakker is, lekker skryf!
Seegogga se Bloggie 
Ag dit is en bly die lekkerste – my Ma (oorl) sou plegtig verklaar het ” Loon op jou Arbeid) . Doe zo voort!
Ai, Dirkie, ek hoop ek ka zo voort doe!
Jy is nie sommer net ‘n klein bloggie nie. Nee! Jy is ‘n waardevolle blog met waardevolle inligting wat al vir soveel mense gehelp het. En nogmaals geluk! Ek het so hoendervleis gekry toe jy vir my die epos aangestuur het! Moenie jouself onderskat nie!! Dis FANTASTIES en die begin van GROOT dinge!
Toorts, dit is agv JOU inspirasie en tegniese hulp dat ek die bloggie begin het! Baie dankie vir jou volgehoue ondersteuning!
Die woorde wil nie reg val vir wat ek voel nie. Ek is so bly vir jou, en mag daardie storie in die leesboek geplaas word sodat vele dit kan lees!!!
Oe, Kameel, dankie dat jy saam met my duimvashou!
Baie geluk 🙂
Baie dankie, Briefie!
Geluk gogga….. ek leer baie by jou en gaan verseker iewers al jou ouer skryfsels lees….. klink vir my baie interessant….. Happy vir jou en bloggie
Ai, Catti, ek dink my ouer skryfsels is beter as die nuwes, maar wat jy nou by my leer is ‘n raaisel! Lees die storie oor “Die gelukkige haai” as jy meer wil weet. Ek wil natuurlik by jou daar op die suidste suide kom kuier, as jy my jou telnr stuur….